سريلانكا 🇱🇰 لؤلؤة المحيط الهندي..

بما إني أصلا بعشق حاجه اسمها عمل خطة للسفر ومكانش ممل بالنسبة لي خالص إني أي وقت فاضي استغله في جمع المعلومات. في البداية كنت عاوز أرخص رحلة لأي مكان من موقعي هذا، وطبعا بدأت بالبرنس Skyscanner، وكنت مقرر من الأول مفيش أي دول عربية ولا أوروبية. أنا عاوز شرق آسيا وتكون حاجه مش common، متهرستش يعني قوي، لأني عاوز اكتشف بنفسي، ودي في حد ذاتها متعة بالنسبة لي. المهم لقيت أرخص حاجة بعد الدول العربية، اختيار من تلاتة: سريلانكا أو نيبال أو كوتشي بكيرلا الهندية. بدأت بنيبال واستعديت كويس وتقريبا جمعت كل المعلومات عنها لدرجة كل حاجة بالتفاصيل الدقيقة بس حسيت انها ممكن مش وقتها حاليا، ممكن بعد شوية fittness، و طبعا كان نفسي أطلع طلعة نيبال بتاع Travel secrets، بس متعوضة قريبا إن شاء الله. فقررت كيرلا، بس لما جمعت كل معلوماتها برضه، اكتشفت طبعا إنها طبيعة خلابة، جنة فعلا، وفيها أماكن كتير جدا تتراح وميتزهقش منها بس حسيت إنها عاوزه وقت أطول شوية، فكان القرار لؤلؤة المحيط الهندي المنسية.. سريلانكا. طبعا كل ما حد يسألني سريلانكا اشمعنى، أقول له مش عارف هطلع وأشوف ☺بدأت أدعبس واجمع كل المعلومات عنها طبعا مخليتش حاجه تقريبا ووصلت لنمر سواقين هناك كمان. المهم رتبت كل حاجه تقريبا ولقيت تذكرة رخيصة علي طيران السريلانكية، حجزتها من قبل حتي ما أكمل البرنامج. بدأت بتوضيب نفسي وشنطتي، وطبعا في دماغي كل الاحتمالات الممكنة وغير الممكنة اللي بتنط بعد كلمة (طب افرض لو……) وحط مليون سبب، متقلقش هتلاقي أسباب كتير، بس كان لازم تاخد قرار كل فترة بره دايرة الراحة بتاعتك. بدأت أول خطوة بالفيزا، هي ممكن تاخدها من المطار أو أون لاين وأنا بحبذ أون لاين سهلة وبـ 30 دولار لمدة شهر، وبتيجي بعدها بيومين أو تلاتة (معايا قعدت أسبوع بس عشان الأعياد عندهم). بالمناسبة أهم خطوة في أي سفريه المعلومات قبل ما تسافر. مثلا أنا عرفت إن رأس السنه البوذيه بتاعهم في 13 أبريل فكان مخططي إنها تكون جوه الأسبوع، أهو نكتشف ونتعرف على ثقافات الشعوب التانية. بعد الفيزا، وطبعا تطبعها على ورقة وتخليها معاك احتياطي (لأن برضه بعد الفرك والدعبسة لقيت حد حصل معاه موقف مش ظريف هناك وأعتقد حالات فردية إنه قالوا له تاريخ ميلادك انت مدخله غلط مع إنه كان مدخله صح ودفع فيزا تاني، علي كلام الراوي). بالنسبة لي هو طلبها مني فعلا يشوفها في ورقه غير الموبايل، وطبعا كنت جاهز بكل حاجة. نزلت مطار كولومبو، مطار ظريف ومحندق. أول ما بتنزل بتملا أبليكاشن في المطار ولو معاك الفيزا أون لاين تدخل علي الجوازات لو مش معاك في مكتب صغير تروح تطلعها منها. خلصنا الجوازات، آه بالمناسبة. أنا حبيت جدا الخطوط السريلانكية، غير إنها شركة كويسة في تعاملهم، بصراحة حبيتهم أكتر بعد ما عملوا لي free upgrade to business class وأنا رايح ?? طبعا رحلتي كانت ست ساعات ونص وحققت حاجه من bucket list ببلاش كده. مش عارف ليه عملوا معايا كده أعتقد لأني كنت محدد كرسي معين بس لأن الطيارة كانت زحمه جدا جدا، الراجل اعتذر لي وقال لي إن مش هينفع الكرسي ده، وكويس إنه منفعش. وأنا أعتقد العربي الوحيد اللي كان في الطيارة.. عاملوني كسايح بقي. نزلنا كولومبو، الصبح بدري كنت من الساعة 8 بالليل اليوم اللي قبله بالمطار ووصلت ستة الصبح. الحلقة التانية, هقول لكم حصل لي إيه أول ما نزلت والمواقف اللي مرت عليا وأول محطة توقف مريت عليها Habarana
الجزء الأول كنت قلت لكم إزاي خلصت إجراءات الفيزا وإجراءات دخول البلد و اللي كانت الحمد لله سهلة جدا. أول نصيحة لو انت عامل برنامج معين ومش عاوزه يبوظ الأفضل يبقي معاك سواق، لأن المواصلات هناك ممكن تبوظ لك برنامجك بالذات لو كان مفيش تضيع وقت كتير فيه وكل حاجة محسوبة ومفيش مجال للتأجيل. لقيت السواق اللي اتفقت معاه، راجل بوذي في أواخر الأربعينات كده، وشكله متدين، طول الوقت بيقعد يتمتم بحاجات كده تقريبا أذكار الصباح بتاعتهم، ومعلق تمثال بوذا صغير بالعربية. وصلت كولومبو (المطار يبعد عن كولومبو بتاع 17 كم) في مكان اسمه katunayake وأقرب حاجة ليه لو عاوز تريح جنب المطار، نيجومبو (قرية صيادين السمك) دي مدينة علي البحر وشاليهات وكده وصلت سبعة الصبح، وكان المخطط هطلع على مكان اسمه habarana، ومش هقعد في كولومبو أول ما آجي وكنت عارف إني هبقي متعب لأن المكان ده يبعد خمس ساعات من المطار، عشان ابدأ برنامج يومي الأول وفي آخر اليوم أبات في أول فندق (هو نجمتين آه بس فل)، بالمناسبة أنا غيرت خمس فنادق وجست هاوس في أسبوع واحد. 😀 وصلت habarana الساعة اتنين الضهر، بالمناسبة السرعة هناك في أحسن الأحوال تقريبا معدتش ستين كيلو في الساعة، السواق لما تهور مرة جاب سبعين، لك أن تتخيل خمس ساعات بسرعه ستين، في طريق من بتاع ليفيل الوحش ده، الطريق عبارة عن ملفات وجبال حواليك في كل حتة واللون الوحيد اللي هتشوفه هناك هو الأخضر، بلد جميلة جدا وسكانها طيبين قوي. أشهر الأماكن اللي لازم تروحها في دامبولا ده مكان جنب هابرانا، dambulla temple cave. ده مكان فوق جبل لازم تطلع له ويفضل في وقت بعيد عن الحر الصبح بدري أفضل، من غير فلوس إنما بتدفع عشان تسيب جزمتك تقريبا 25 روبية.. بالمناسبة العملة هناك الروبية السريلانكية ودي الجنيه بـ 16 روبية، ابسط ياعم الجنيه المصري ليه قيمه هناك 🙂 خلصت الجبل وطبعا كنت ميت تعب لأني بقالي يوم كامل منمتش، طلعت علي الفندق ونمت لأني عندي يوم طويل بكره، في sigiriya وما أدراك ما سيجيريا. ?? صحيت تاني يوم سبعة الصبح، ده الميعاد الرسمي وفي أيام صحيت خمسة وفي يوم صحيت اتنين ونص آه والله زي مابقول لك كده. انطلقت لسيجيريا وطبعا أشهر حاجة عندهم صخرة سيجيريا لازم تروحها، بصراحة سريلانكا كل الفصول ممكن تشوفها وانت هناك، الجو حر جدا والرطوبة كانت فوق 80%، في أي وقت ممكن تمطر، بس برضه الأجواء تحفة بعد كل ده. ?? خلصت سيجيريا، وكنت حابب أشوف أماكن حواليها مش تقليدية، لقيت توكتوك، طبعا الفصال هناك ده أساسي، يعني قالي 1000 روبية، رسيت علي 250، فاصل معاهم جامد بالذات التكاتك، المهم الواد ظبطني ووداني كام حتة حوالين سيجريا، وخدت صور عظيمة فيها. المهم، طلعت بعد سيجيريا، كنت حابب أمشي في forest حقيقية مش صناعية للسواح وكده، المهم رحت فعلا غابه مع السواق اللي كان معايا، حاجة كده تحفة كإنك في لعبة لارا كروفت بالظبط، في منطقة اسمها ritigala.. الجزء الثالث هقول لكم شفت إيه في الغابة وإيه المفاجأة اللي حصلت معايا
نكمل مع بعض الجزء التالت في رحلتي لسريلانكا.. في الحلقة اللي فاتت خلصنا سيجيريا وطلعنا أهم حاجة هناك وهي صخره سيجيريا، ودي أشهر معلم بسريلانكا، وحاول تروح بدري لو قررت تطلعها، لأنها هتعوز مجهود وسلالم والجو حر هناك، وتذكرتها لوحدها بـ 4000 روبية، المهم خلصنا سيجيريا ورحت عملت: Elephant ride .?? طبعا تجربة حلوة وممتعه وانت راكب في رقبة فيل محترم جدا وماشي بيك وسط بيئته الطبيعية وبراحته جدا ينزل بيك في ميه ماشي يدخل وسط غابات وأشجار ماشي حلو جدا الصراحة وخلي بالك الناس اللي معاه بيعتمدوا علي البقشيش زي كل سريلانكا بمعني هيقولك هات الموبايل أصورك وانت راكب، دي بمقابل خد موز أكل الفيل بمقابل، يعني انت زي ما تحب هم مش جشعين إنما فقرا جدا، وزي ما تحب تقريبا البقشيش من 100 لـ 200 في الحدود دي وطبعا فاصل. المهم كان الخطة إني أروح POLONNARUWA بس غيرت الخطة لأنها منطقة مكشوفة واليوم ده كان الرطوبة فوق 80% وكنت في وقت العصر وكنت حابب أروح غابة طبيعية مش حاجة للسياح صناعية ومعمولة مخصوص يعني، ودي ميزة إنك لوحدك وتقدر تغير في قراراتك علي حسب الظروف المهم قررت أروح غابة فعلا في منطقه اسمها Ritigala ودي كانت بره البرنامج اللي أنا مخططه بس تقريبا كانت أحسن حاجه في اليوم ده والدخول ببلاش كمان.??? ودي فيها واحد من أكبر 4 جبال في سريلانكا وحتى أعلى من صخره سيجيريا هتحس وانت جوه إنك اتنقلت لعالم تاني هتحس انك فعلا بدون أي مبالغة جوه لعبه لارا كروفت فكرة انك في غابة طبيعية وحواليك قرود وسامع كل أصوات الطبيعة وكأنك في فيلم سينما وفي نفس الوقت بتلاقي جبال وآثار قديمة من القرن الأول قبل الميلاد. وممرات وأودية وكهوف حاجه من الخيال (ونصيحة مني حاول ما تغوطش قوي لوحدك وخلي بالك من الطرق وانت ماشي عشان متتهوش زيي وتلاقي نفسها فجأة وسط غابة ومش عارف تطلع منها ونفسك تقول: خلاص ذيعوا الحلقة بقي بطلوا هزار 🙂 مفيش غيرك انت والقرود بس. خلصت هابارانا وسيجيريا وقررت أعمل مساج سريلانكي مشهور جدا في الهند وسريلانكا اسمه Ayurvedic massage وده نوع مشهور جدا من المساج خاصة في الهند وفي كيرلا تحديدا (بالمناسبة كيرلا أقصى جنوب الهند وأقرب نقطة لسريلانكا 18 كيلو أعتقد بس بالبحر) وده مساج بزيوت طبيعية معينة للجسم والراس بطريقة معينة كده، وخلي بالك لأن في كتير من الأماكن مبتبقاش أصلية وأي كلام، فالأفضل تكون سائل حد من أهل البلد أو مدعبس كويس المهم عملت المساج تقريبا بـ 2500 روبية. خلصت و انطلقت في طريقي إلى كاندي حيث بداية السحر والجمال.. في الطريق لكاندي هتعدي على Matale ودي هتلاقي فيها معبد هندوسي مشهور اسمه: Sri Muthumariamman Kovil Temple وبرضه ببلاش، تصميمه مميز وببلاش إلا لو هتدخله وأنا منصحش مش هتلاقي فيه حاجة قوي وده بناءا علي نصيحة صديقي البوذي (كان بيوفر لي الصراحة) هو أكتر للصلاة منه للسياحة، ودي نقطة مهمة انك لازم قبل ما تطلع مكان تلم كل المناطق اللي عاوز تشوفها وتدرسها كويس عشان تبقي فاهم انت رايح فين وهتعدي على إيه وتطلب من السواق يوديك الأماكن دي. وانت بالطريق برضه هتعدي على حديقة مشهورة للأعشاب والنباتات الطبيعية لو انت مهتم تشتري حاجة أصلية من الأعشاب وتتفرج علي نباتات غريبة أول مره تشوفها اسمهاAyurveda spice gardenوممكن تعمل كمان فيها مساج للراس بالزيوت الطبيعية. المهم، وصلت كاندي تقريبا بعد ساعتين ونص، وأخدت جولة سريعة فيها لأني مخطط يومين لكاندي.. كاندي يا سيدي مختلفة شوية هتحسها أكثر نضافة، جوها أحلى تحس إنها بلد بنت ناس ومستحمية بالمقارنة بالباقي. عندك أهم الأماكن في كاندي: 1 Kandy view point ودي مكان عالي كده بتروحه بتشوف كاندي كلها من فوق في منظر من الخيال. 2- Gem museum and factory, Wood carving work shop لو انت مهتم بالمجوهرات الأصلية والأحجار الكريمة وشغل اليدوي من الأخشاب وكده (نصيحة لو رحت متحف المجوهرات متاخدش مراتك معاك) هتلبس أكيد، إذا كنت أنا لبست ومش معايا مراتي ما بالك بقى. 3- Cultural dance show in Kandy وده عرض فولكلوري مشهور بتحضره لو حابب أعتقد بفلوس بسيطة (أنا حضرته مع السواق) لطيف مش وحش وتغيير. 4- Kandy lake ودي أكبر وأهم بحيرة عندهم وهتشوف جواها جزيرة صغيرة كده بتاع الملك لما كان بيحب ينفرد بنفسه ويقعد يفكر في شؤون البلاد، قعده لوز اللوز الصراحة. البحيرة دي على فكرة من سنة 1807. 4- Temple of the Sacred Tooth ببلاش دخوله (بس في تفتيش جامد قوي، أي حاجة مشكوك فيها هياخدوها منك حتى إزازة الميه)، ده أهم معبد بوذي هناك وأكبرهم وأشيكهم والرسمي بتاعهم وكبير جدا وممكن تقابل الـMonks من كل حتة في العالم فيه. والدخول جوه المعبد نفسه بفلوس بسيطة بس برضه ما أنصحش تدخله مفيهوش حاجه قوي غير سنة لبوذا (انت بتدخل من البوابة الرئيسية بتلاقي ساحة كبيرة والمعبد الرئيسي في الآخر وده اللي بفلوس) ومش في كل الأوقات بيطلعوها في السنة للجمهور وفي الغالب مش هتشوفها لأنه زحمة والكل بيصلي فيه. صحينا الصبح كالمعتاد ستة ونص اتحركت من كاندي في اتجاه اليوم العظيم اللي لو رحت سريلانكا ومعملتوش تبقي مرحتهاش، وهو إنك تقابل وجها لوجه نهر كيتوالجا وما أدراك ما نهر كيتوالجا.. ده أكبر وأعنف وأقوى نهر عنده من بين تلات أنهار رئيسية في منطقه اسمها كيتوالجا ودي مليانة أكشاك صغيره طول الطريق بيعملوا الرافتنج (الفرد تقريبا 3000 روبية). عملت الرافتنج، طبعا مهما قلت السحر وكميه الأدرينالين اللي بتتطلع فيه، خلصنا الرافتنج وطبعا ما فوتش فكرة انك تنط في وسط النهر ده وتعوم فيه (معرفش مسموح ولا لا ) وبكده تبقى أتميت حاجة مهمة من رحله سريلانكا 🙂 خلصنا اليوم العظيم بتاع الرافتنج وقررنا نطلع علي إنجلترا!.. اه زي ما بقول لك كده ماهو هناك في إنجلترا برضه بس علي صغير. قررت طبعا إني أروح الساحرة NUWARA ELIYA????? بلد صغيرة إنما جمال مش هتشوفه في أي مكان غير هناك. قررت أروح بالقطر واعمل رحله بالقطر مع السريلانكيين وعلي فكرة عندهم شبكة قطارات قوية، بس مشكلتها إن القطارات بتاعتهم قديمة شوية من أيام الاحتلال البرتغالي والهولندي والبريطاني، حاجة عتيقة بس حلوة. وبالنسبة للقطر لو انت حابب في كذا درجة سياحية، في السبنسة وفي التانية وفي التانية المكيفة وفي الأولي وفي حاجه بس لو عاوز تحجزها لازم من فتره كبيرة وأونلاين اسمهاObservation car ودي موجودة للسياح في أغلب البلاد عشان تشوف بقي كويس وانت قاعد وكده. أنا حجزت التانية وبصراحة من جمال المناظر كنت مقضيها علي الباب واقف بتملي عينك باللون الأخضر. المهم أنا كنت مقرر آخد رحلة من محطة اسمها Hutton وهنزل في Nanuoya وتقريبا دي بتاخد ساعتين وده كان كافي لي عشان أكمل برنامجي، وفي مسارات ممكن تاخد وقت أطول لو حابب وأشهرهم وأحلى مناظر هتلاقيها علي الخط ده اللي ممتد من ELLA-KANDY وانت ومزاجك بقي ووقتك، والتذاكر رخيصة جدا وممكن تشوف هنا اللي انت عايزه، علي حسب المسافة والدرجة: http://www.railway.gov.lk/ المهم وصلت NANUOYA وطلعت من هناك علي الساحرة عاشقة الجمالNUWARA ELIYA أو ماتوصل نوراليا ومبتبقاش عاوز توصل من جمال مزارع الشاي اللي بتشوفها علي الطريق بتلاقي نفسك كده وصلت مكان تخيل معايا كله جبال وتلال اخضر في اخضر مزارع الشاي في كل حته كل الاوتيلات علي الجبال الجو ممتاز وبارد نسبيا عن اي مناطق سريلانكا الضباب موجود فوق قمم لجبال بالمناسبه في مسلمين كتير والاظل هتعرف تاكل هناك عكس كل مناطق سريلانكا اللي اتعذبت فيها بسبب مفيش اكل حلال في اغلب الاماكن .لدرجه ان اول فندق رحته نجمتين اه بس ماشي الحال بسالهم علي القبله فين ::مش عارفين يعني ايه قبله اصلا بيقلي حضرتك اول مسلم ييجي الفندق (ربنا يهديهم). المهم عندك في نوراليا ممكن متروحش في أي حتة كفاية انك تقعد قدام البحيرة وتنسى الدنيا ولو عاوز تعمل حاجة انزل اتمشى علي رجلك وشوف البلد واتعرف علي ناس جديدة، فعلا أنا وصلت يوم رأس السنة البوذية، وطبعا كان في احتفالات هناك ومهرجانات زي عندنا والشباب السيلاني كان عامل شغل جامد وممكن تاخد توكتوك وتلف بيه لو انت حابب ومش قادر، وطبعا فاصل جامد يعني النص أو التلت على طول من السعر، ولو عاوز تروح أماكن ممكن Hill country – Golf course, Lake gregory, Strawberry farm and restaurant, Hakgala botanical gardens ورأيي اتمشى واكتشف بنفسك ده جزء من متعة الرحلة، خلصنا نوراليا وطبعا متنساش تنزل جوه مزارع الشاي وتستمتع وتاخد صور مش هتلاقيها في حتة، وطبعا في جنب نوراليا علي الطريق أشهر شلالات في سريلانكا لازم تروحهم ومتفوتهمش، St Clair’s water falls وهتلاقي مصانع شاي كتير علي الطريق لو عاوز تشتري كل أنواع الشاي اللي تخطر علي بالك، أنا دخلت مصنع منهم ويقعدوا يشرحوا لك الأنواع وتدوق كل أنواع الشاي اللي تخطر على بالك في جولة سريعة كده، وهتلاقي مليون لون للشاي جوه، لا تقول لي ليبتون ولا شاي أحمد ولا العروسة حتي.. 😄
على غير المعتاد، صحيت الصبح وده كان يوم مرهق شوية، صحيت الساعة 4 الصبح وجهزت نفسي للانطلاق إلى Horton Plains ودي منطقه جبال شويه وتلال مفتوحه العربيات بتوصل فيها لحته وبعد كده انت بتعملTrekking وتمشي جوه الجبال والتلال دي وسط مناظر وخضره وجمال غير عادي وحيوانات بتقابلك وشغل عالي وبتوصل لنقطتين مهمين فيها اذا قدرت يعني نهاية العالم الصغرى وبعد كده نهاية العالم الكبرى WOLRD END ودي أعلي نقطة وهي اسمها كده لأنك من فوق تقدر تشوف سريلانكا والجبال حواليك من كل حتة، طبعا حلوة جدا بس أغلى شوية من حاجات كتير تقريبا هتكلفك بالجيب والدخول (في حدود 8000 روبية سريلانكية). عندك اختيار تاني برضه أرخص شويه ونفس الفكرة ومش مشهور قوي زي هورتون اسمه Moon Plains ده أرخص شويه (في رانج او 6000 5000 روبية) وبرضه Trekking وبتوصل لنقطه برضه تشوف أكبر أربع قمم جبلية بتحوطك من كل حتة بس لو قررت أعتقد إن هورتون هتبقي أفضل. خلصنا من التعب، يومنا النهارده هيكون في BENTUTA عروسه الساحل السيلاني ☔☔☔☔ بنتوته مدينة ساحلية مشهورة بحر وشغل جامد تقريبا المسافة بالعربية ممكن 6 أو 7 ساعات لو هتروح من نورراليا وتحاول تروح بدري لو قدامك مشوار لأن أكيد البحر هتلاقي نفسك آخرك الساعة خمسة ولا ستة وكل حركات البحر ويومه بيخلص. وصلت بنتوته طبعت مش عاوز أقول لكم علي شط بنتوته عامل إزاي وفكرة انك بتعوم في المحيط الهندي وجزر وجمال غير عادي بتشوفه مع الغروب قدامك متتوصفش، غصب عنك هتحب بنتوتة، طلعت بعد كده علي MIRISSA ودي منطقة جنب بنتوته فيها أشهر حاجة بتتعمل انك بتطلع بمركب من ستة الصبح برضه جوه المحيط لحد ما توصل لمكان وتقابل الحيتان وجها لوجه⚓⚓ تخيل كده ان حواليك مش قرش، لا انت بتقابل وتشوف الحوت الأزرق، أكبر الحيوانات المعروفة على الأرض وموجودة حتى يومنا هذا، طوله أكتر من 30 متر طبعا بتاخدوا وقت على ما تلاقوه وسط المحيط انت بتدور فعلا عليه لحد ما تلاقيه في رحله مطارده بالمراكب مثيرة جدا، الحمد لله شفته وسلمت عليه. وانطلقت بعدها في السريع لأني مكانش عندي وقت خالص رحت مكانين كنت حابب أشوفهم ومحضر لهم الأولى قرية هيكاداوا، ودي أكتر مكان اتضرر من تسونامي سريلانكا في 2004 وطبعا ساعتها اتقال القصة المشهورة بتاع ان بسبب إن القرية دي كان منتشر فيها كل أنواع الفواحش كانت بتحصل فيه عيني عينك كده، حتى السواق نفسه قالي إن البوذيين نفسهم عارفين الكلام ده. المهم لحظة انك واقف في نفس المكان اللي تسونامي بدأ فيه وموت أكتر من 40 ألف واحد وسوا القريه بالكامل بالأرض وإلى الآن المكان تغير خالص من قبل وبعد تسونامي لحظه تخليك تقشعر أصلا. المهم برضه انطلقت إلى GALLE ⛵⛵⛵⛵ ودي منطقة بعد بنتوته وانت في طريقك لكولومبو وممكن في الطريق تشوف حاجتين عندك أماكن كتير لتربية السلاحف وعندهم كل الأنواع والنادر منها كمان وهتلاقي منها كذا واحدة على الطريق اللي جالي، أنا رحت واحده منهم سعرها مش غالي خالص (500 روبية)، حلو وصغير وتاخده وانت في الطريق كده وانت ماشي. الحاجة التانية اللي لو حابب تشوفها اسمها STILT FISHING ودول ناس بتلاقيهم علي طول الطريق الساحلي وانت رايح كولومبو بيصطادوا بالطريقة الهندية والسريلانكية القديمة وبيبقوا قاعدين علي عصيان كده جوه الميه (والله لو ليك في التصوير زي حالاتي وعاوز صور عالمية) دي من أشهر مناظر الصيد اللي مش هتلاقيها في حتة بس نصيحتي متبينش نفسك انك سايح وكده لأن هم أغلبهم ناس عاملين نفسهم بيصطادوا عشان يطلعوا منك سبوبه ويسيبوك تصورهم لأن قليل منهم اللي هتلاقيه صيادين بجد بيمثلوا يعني ومش هتخلص منهم فابقى خلي بالك لو عاوز تصورهم، أو انت وشطارتك بقى (أنا صورتهم من العربية الصراحة). وصلت GALLE، ودي فيها أشهر قلعه في سريلانكا أيام الاحتلال البرتغالي والهولندي وتخلصها في ساعتين كده في السريع، وانت رايح كولومبو، فيها أشهر فنار وميناء علي البحر من ايام الاحتلال البرتغالي والهولندي. FORT GALLE دي اتبنت سنه 1588. عندك كمان DUTCH HOSPITAL دي من أيام الاحتلال الهولندي وهتلاقي معسكرات وبيوتهم لسه موجوده بنفس الشكل الأوروبي المميز ليهم. عندك كمان: SIEGE OF GALLE All Saint:s church The Dutch Reformed Church ودي من أقدم الكنائس هناك برده اتبنت سنه1755 وتقدر تزورها برده (كل ده من غير فلوس) Galle Lighthouse وغيرها كتير وتتمشي في المدينة القديمة وعندك برده كافيهات وحركات. خلصت وانطلقت لكولومبو آخر محطة وأسرع محطة عشان ألحق طيارتي. وصلت كولومبو بالطريق السريع (وده أول طريق سريع أشوفه في سريلانكا قلت بقى هنطير على 200 ولا حاجة دا بفلوس يعني عشان ألحق الطيارة برضه آخرنا 90، وصلت كولومبو وكنت هموت من الجوع ولقيت كنتاكي (علي فكرة ده أعتقد الوحيد في سيريلانكا) وضربتلي أكلة مع إن المينيو بتاعهم مختلف برضه، رحت زرت البرلمان السريلانكي بيفتخروا بيه قوي، وطلعت علي المطار اللطيف بتاعهم خلصت أموري وخدت طيارتي بس المرة دي من غير Free upgrade وخلصت سريلانكا بس مخلصش اللي عملته واللي غيرته فيا واللي اثرت فيا بشكل ايجابي جدا، ورجعت معايا ذكريات لا تقدر بثمن، وكمان معايا 70 جيجا تصوير 🙂.